מוצאי שבת קודש

עס איז מוצאי שבת קודש לסדר פקודי, דער נשמה יתירה האט אונז איבערגעלאזט כצאן בלי רועה, ספעציעל נאך אזויפיל ספרי תורות און חזקות, יוצר השקלים און ראשי חדשים, חסידישע אידן ווישן אפיר אביסעלע שריים פון שבת קודש און פראווען סעודת דוד מלכא משיחא, פארציילן ספורי ומופתי צדיקים און זינגען שירות ותשבחות לקל חי.

לאנדאן האלט נאך א סאטמארע אטאקע, סטאמפארד הילל האט זוכה געווען צו א פערזענליכע ביקור פון צוויי ברודערס מעצי התמרים, דער דרך הבעש"ט האט ווידער ארויסגעשיינט מיט א מעכטיגע תפארת, א געוואלדיגע קידוש שם שמים האט זיך דא אפגעשפילט, קינדער האבן געזעהן ווי די טאטעס זענען איבערגעגעבן מיט מסירת נפש לה' ולתורתו.

קריסטאל נאכט האט זיך ווידער אפגעשפילט מיט 65 יאהר שפעטער, אין די טיפענישן פון סטאמפארד הילל צווישן קלאפטאן קאממאן און קעזנאוו ראוד האט מען געטריבען אחב"י פון בית מדרש לבית מדרש, אין שפיץ פון די דאזיגע קריסטאל נאכט האט אבער נישט געפלאטערט אן "עס עס" פאן, נאר א פאן פון טייטל ביימער, א פאן פון על הגאולה ועל התמורה וועלכע האט אויסגעלאשן לעקטערס און געשטעלט כלבים על פתחי התורה.

אידן מיט ווייסע בערד זענען געלאפן בין רחובות העיר ווי נערווען קראנקע חולים, פון אידן וועלכע טוען פרעזנטירן דעם "שמרה נפשי כי חסיד אני" האט גערינען שפייעכץ פון תאות הנצחון.

* * *

סאטמארע רבי זצוק"ל, דער בעל מחבר ספה"ק ויואל משה, וועלכע האט נאכן חורבן אייראפע ווי דער נאצי ימ"ש האט מחריב געווען דעם גאנצן דור הישן, געקעמפט ווי א לייב קעגן די נעגל הכופרים ומורדים, בבחינת שה אחת בין שבעה זאבים, און געבויט צוביסלעכווייז א דור פון ערליכע אידן, יראי השם און אמת'דיגע עובדי התורה. און דערמיט אויפגעשטעלט א פרישע דור פון עמך ישראל, א נייע כלל ישראל על דרך המסלולה, מיט געוואלדיגע חיזוק פאר די צושמעטערטע נפשות.

און דערמיט איז געקומען דער טיטל "סאטמאר", א סימבאל פון מכבים בימי היוונים סלאגאנדיג מיט "מי לה' אלי".